Marie de France

D Marie de France isch e französeschi Dichterin gsi.

Si isch die erschti Autorin vo dr altranzösische Literatur, wo me kännt. Vo ihrem Läbe weiss men aber fasch nüüt, numme grad, dass si sälber gseit het, si sig vo Frankrych, was dozmol eifach dr Grossruum vo Paris bedütet het, und dass si öppen ums Joor 1200 z Ängland gstorben isch.

D Wärch vo dr Marie de France sind imene anglonormannische Dialäkt gschribe. Es dörfte Sache sy, wo si für d Lüüt vom änglische Königshof verfasst het.

E grosse Deil vo dr Marie de France ihrne Tegscht sind d Lais, grossi Värsgedicht, wo Määrli und Saage us em keltische Kulturkreis vo Britannie drin vorchöme. In es bar vo dene Verzellige seit d Autorin, wie s de Fraue deils nid guet ggange sig i dr soziale Situazioon vo dere Zyt, wo si drin gläbt het.

Öpis anders sind d Faable, wo d Marie de France ufgschribe het; die Gschichte chöme ursprünglech vom alte Dichter Aesop.